Leviticus 19

Imithetho yempilo engcwele

1UJehova wathi kuMosi, 2“Tshela lonke ibandla lika-Israyeli uthi kulo: ‘Yibani ngcwele ngokuba mina uJehova uNkulunkulu wenu ngingcwele.

3“ ‘Ngulowo lalowo kini kahloniphe unina loyise njalo kumele ligcine amaSabatha ami. Mina nginguJehova uNkulunkulu wenu.

4“ ‘Lingaphendukeli ezithombeni loba lizibumbele onkulunkulu benu. Yimi uJehova uNkulunkulu wenu.

5“ ‘Nxa lisenza umhlatshelo womnikelo wobudlelwano kuJehova kwenzeni ngendlela ezakwenza wamukeleke ukusiza lina. 6Kumele udliwe ngalo ilanga lomhlatshelo loba ngelanga lakusasa. Lokho okuseleyo kuze kube lilanga lesithathu akutshiswe. 7Lokho okudliwa ngelanga lesithathu kuzabe sekungcolile kungabe kusemukeleka. 8Lowo okudlayo uzakuba lomlandu ngoba uzabe esengcolise lokho okungcwele kuJehova.

9“ ‘Lapho liqoqa isivuno samasimu enu lingavuni konke kuze kube semaphethelweni ensimu kumbe lize liguduze konke. 10Lingakhi izithelo ezikhithikileyo. Zitshiyeleni abayanga lezihambi. Mina nginguJehova uNkulunkulu wenu.

11“ ‘Lingebi. “ ‘Lingaqambi amanga. “ ‘Lingakhohlisani.

12“ ‘Lingafungi amanga ngebizo lami bese lihlambaza ibizo likaNkulunkulu wenu. Mina nginguJehova.

13“ ‘Lingaqilibezeli umakhelwane wenu, lingamkhuthuzi. “ ‘Umuntu oqatshiweyo lingambambeli iholo lakhe kuze kube kusasa.

14“ ‘Lingathuki isacuthe loba liphosele isikhubekiso phambi koyisiphofu, kodwa yesabani uNkulunkulu wenu. Mina yimi uJehova.

15“ ‘Lingawutshili umthetho; lingabandlululi umyanga kumbe litshengise ukukhetha abakhulu, kodwa lahlulele umakhelwane wenu ngokulunga.

16“ ‘Lingahambahambi linyeya kwabakini. “ ‘Ungenzi lutho olulimaza umakhelwane wakho. Mina yimi uJehova.

17“ ‘Lingamzondi umfowenu ngezinhliziyo zenu. Khuzani umakhelwane likhululekile ukuze lingabi lomlandu njengaye.

18“ ‘Lingaphindiseli loba ligodle isikhwili komunye wabantu bakini, kodwa thandani umakhelwane wenu njengalokhu lizithanda lina. Mina yimi uJehova.

19“ ‘Gcinani izimemezelo zami. “ ‘Lingenzi izifuyo zenu zikhwele ezolunye uhlobo. “ ‘Lingahlanyeli insimu yinye ngezinhlobo ezimbili zenhlanyelo ezahlukeneyo “ ‘Lingavunuli izigqoko ezenziwe ngemihlobo yamalembu amabili atshiyeneyo.

20“ ‘Uma indoda ingalala lowesifazana oyisigqili osethembise enye indoda kodwa ongakahlengwa loba waphiwa inkululeko, kayijeziswe leyondoda. Kodwa mabangabulawa ngoba lowo owesifazana kakaphiwa inkululeko.

21Kodwa indoda kumele ilethe inqama esangweni leThente lokuHlanganela ibe ngumnikelo wecala kuNkulunkulu.

22Ngaleyonqama yomnikelo wecala umphristi kamenzele indlela yokubuyisana kuJehova ngenxa yesono asenzileyo. Isono sakhe sizathethelelwa.

23“ ‘Nxa selingenile elizweni lahlanyela loba yiziphi izihlahla ezidliwayo, lingadli izithelo zazo ngoba kuyazila. Ziyazila okweminyaka emithathu; mazingathintwa. 24Ngomnyaka wesine zonke izithelo zazo zizabangcwele, zibe ngumnikelo wokudumisa uJehova. 25Kodwa ngomnyaka wesihlanu lidle-ke izithelo zazo. Ngaleyondlela isivuno senu sizakwandiswa. Mina yimi uJehova uNkulunkulu wenu.

26“ ‘Lingadli inyama elegazi. “ ‘Lingenzi izinto zokuvumisa loba ubungoma.

27“ ‘Lingagundi inwele emaceleni amakhanda enu njalo lingageli indevu zenu.

28“ ‘Lingazisiki imizimba yenu ngenxa yabafileyo kumbe lizicabe. Mina yimi uJehova.

29“ ‘Lingalulazisi amadodakazi enu ngokuwawulisa funa ilizwe lehlelwe yibubi bokuphinga.

30“ ‘Gcinani amaSabatha ami lihloniphe indlu yami engcwele. Mina yimi uJehova.

31“ ‘Lingayi kwabayizangoma loba lidinge izanuse ngoba bazalingcolisa. Mina yimi uJehova uNkulunkulu wenu.

32“ ‘Sukumelani asebeluphele, lihloniphe abantu abadala, limesabe uNkulunkulu wenu. Mina yimi uJehova.

33“ ‘Nxa owezizweni ehlala lani elizweni lenu lingamhluphi. 34Lowo owezizweni elihlala laye kaphathwe njengowozalo elizweni. Limthande njengoba lizithanda lina lalingabezizweni eGibhithe. Mina yimi uJehova uNkulunkulu wenu.

35“ ‘Lingasebenzisi izilinganiso zokuqilibezela nxa lilinganisa ubude, isisindo loba umthamo. 36Sebenzisani izilinganiso eziqotho, i-efa elilungileyo lehini eliqotho. Mina yimi uJehova uNkulunkulu wenu owalikhupha eGibhithe.

37“ ‘Gcinani zonke izimemezelo zami layo yonke imithetho yami liyilandele. Mina yimi uJehova.’ ”